Von der Leyen presidentea eta Komisarioen Elkargoa New Delhin egon ziren otsailaren 27an eta 28an, munduko demokraziarik handienarekiko harremanetan sakontzeko.
Presidentea eta Elkargoa Narendra Modi lehen ministroarekin eta haren gobernuarekin bildu ziren, aztertzeko nola eraman EB-India Elkarte Estrategikoa hurrengo mailara.
Bisita hori aurrerapauso garrantzitsua izan da harremanean. Izan ere, EB-India Agenda Estrategiko berriari forma ematen lagunduko du. Von der Leyen presidenteak bere orientabide politikoetan iragarri zuen agenda hori, eta datozen hilabeteetan aurkeztuko da.
Von der Leyen presidenteak hasierako hitzaldia eman zuen eta, ondoren, prentsaren aurrean agertu zen egun horretan bertan, Modi lehen ministroarekin batera.
EBren eta Indiaren arteko loturak indartzearen alde agertu zen, gero eta konplexuagoa den mundu honetan. Von der Leyenek azpimarratu zuen bi alderdien interesak bat datozela gehienetan, eta adierazi zuen lehentasun komunak birdoitzeko unea iritsi dela, gai bakoitzean akordio bat lortzeko ahalegina egin beharrean.
Presidenteak EB-India lankidetzaren etorkizuna definituko duten funtsezko hiru arlori buruz hitz egin zuen: merkataritza eta teknologia, segurtasuna eta defentsa, eta konektibitatea eta elkartze globala.
Beste iragarki garrantzitsu batzuen artean, von der Leyen presidenteak esan zuen bera eta Modi lehen ministroa ados zeudela EB-India merkataritza negoziazioetan aurrera egiteko beharrarekin, aurten akordio bat lortzeko asmoz.
Era berean, iragarri zuen Batzordeak Indiarekin segurtasun eta defentsa elkarte bat eratzeko aukera aztertuko duela, EBk Japoniarekin eta Koreako Errepublikarekin duen elkartearen antzekoa. «Horrek gure lana areagotzen lagunduko digu, mehatxu komunei aurre egiteko: mugaz haraindiko terrorismoa, itsas segurtasunaren aurkako mehatxuak, zibererasoak edo egun ikusten dugun fenomeno berria: gure azpiegitura kritikoen aurkako erasoak», adierazi zuen.
Halaber, EB eta India saiatuko dira beste lankidetza eremu batzuetan sakontzen: adimen artifiziala, 6G, erdieroaleak, errendimendu handiko informatika, droneak eta hornidura kate erresistenteagoak.
