Europako Parlamentuak, Kontseiluak eta Batzordeak Bizikletaren Erabilerari buruzko Europako Adierazpena onetsi dute. Adierazpen horrek lagunduko du estatu kideetan mugikortasun aktiboko modu hori garatzen, bai eta garraioaren emisioak murrizten ere, herrialdeen arteko abiapuntu desberdinak alde batera utzita.
Adierazpenak oinarri du Europako Batzordeak 2023ko urrian egindako proposamen bat, eta Parlamentuaren eta estatu kideen eskaerei erantzuten die. Hala, konpromiso politiko bateratua eta iparrorratz estrategikoa da bizikletarekin lotutako egungo eta etorkizuneko ekimenetarako.
Testuak onartzen du bizikleta garraiobide jasangarria, irisgarria eta eskuragarria dela, eta balio erantsi handia duela Europar Batasuneko ekonomiarentzat. Europa, estatu, eskualde eta toki mailan hartuko diren konpromisoen artean, honako hauek daude: txirrindularitza sare seguru eta koherenteak hirietan, garraio publikoarekiko konexio hobeak, aparkaleku seguruak eta bizikleta elektrikoak kargatzeko puntuetarako sarbidea.
