Kalitatezko praktikaldiak lagungarriak izan daitezke gazteentzat, lan-esperientzia praktikoa har dezaten, gaitasun berriak ikas ditzaten eta, azken batean, kalitatezko enplegua aurki dezaten. Enpresaburuentzat ere lagungarriak dira, talentuak erakarri, prestatu eta atxikitzeko aukera ematen baitiete. Kalitatezko praktikaldiek lan-baldintza bidezkoak eta gardenak eta ikaskuntza-eduki egokia eskatzen dituzte.
EBren Praktikaldiei buruzko 2014ko Kalitate Esparruak kalitatezko 21 printzipio ezarri zituen, kalitate handiko ikaskuntza eta lan-baldintzak bermatzeko. Kontseiluaren gomendio horren 2023ko ebaluazioan, Batzordeak egiaztatu zuen eragin positiboa izan zuela EBko praktikaldien kalitatean. Hala ere, Batzordearen ebaluazioak adierazi zuen hobetzeko tartea ere bazegoela, eta bai Europaren Etorkizunari buruzko Konferentziak, bai Europako Parlamentuak, Batzordeari eskatu zioten praktikaldiak hobetu zitzan.
