Sei eskualdek, lehen aldiz, jakinarazi dute Mendebaldeko Niloko birusaren infekzio-kasuak izan dituztela.
Eltxoek transmititutako gaixotasunen arriskua areagotuz doan neurrian, beharrezkoa da Europak prestakuntza- eta kontrol-lanak areagotzea. Hala, Mendebaldeko Niloko birusak Europako beste eskualde batzuetara zabaltzen jarraitzen du, eta eltxo inbaditzaileen beste espezie batzuk hedatzen ari dira Europako beste leku batzuetan.
Aurten, Europako sei eskualdek lehen aldiz jakinarazi dute Mendebaldeko Niloko birusak eragindako infekzio kasuak izan dituztela, tokiko transmisio bidezkoak. ECDCren asteko zifra berrienen arabera, 2026ko abuztuaren 13ra arte, Mendebaldeko Niloko birusaren 429 infekzio-kasu –tokiko transmisio bidezkoak– jakinarazi zituzten Europako bederatzi herrialdetan. Transmisioa abuztuan eta irailaren hasieran iristen denez gorengo mailara, kasu gehiago izatea espero da.
Eltxo tigrea
Mendebaldeko Niloko birusa transmititzen duten eltxoak (Culex eltxoak) jadanik oso zabalduta daude Europan. Asiako eltxo tigrea, berriz, (Aedes albopictus), dengea eta chikungunya birusaren gaixotasuna transmiti ditzakeena, jadanik zabalduta dago Europako 16 herrialdetan (duela 12 urte baino bi aldiz gehiago).
ECDCk eta EBko bazkideek Eurosurveillance aldizkarian gaur argitaratutako artikulu baten arabera («Eltxoen kontrola areagotzeko beharra, gora egiten diren eltxoen transmisio-gaixotasunak kudeatzeko»), hainbat hutsune antzematen dira Europak eltxoak kontrolatzeko duen gaitasunean, eta koordinazioa hobetzearen eta kontrol hori areagotzeko tresna-multzo zabalago baten alde egiten du. Horrekin batera, ECDCren txosten bat argitaratu da, Europan eltxoak zaintzeko eta kontrolatzeko jardunbideei buruzkoa. Txostenean, eltxoak kontrolatzeko programa eraginkorragoen beharra azpimarratzen da.
Dengea eta chikungunya
ECDC lanean ari da Europako herrialdeei laguntza emateko. Hala, Mendebaldeko Niloko birusak, dengeak eta chikungunya birusaren gaixotasunak eragindako infekzioen urte-sasoiko jarraipena egiten du, eta, halaber, arriskuen ebaluazioak, eltxoen hedapen-mapak, ereduak eta agerraldien aurreko prestaketari, prebentzioari eta erantzunari buruzko orientabide praktikoak.
Eltxoak modu eraginkorrean kontrolatzeko, beharrezkoa da ikuspegi integral bat izatea, honako alderdi hauek uztartuz: eltxoen eta gaixotasunen jarraipena, larba-haztegien kontrola, parte-hartze komunitarioa eta tokiko baldintzetara egokitutako kontrol espezifikoa.
Komunitateek eta gizabanakoek zeregin garrantzitsua betetzen dute eltxoen populazioak murrizteko lanean, etxebizitzen barruetako eta inguruetako ur geldiak (balkoi eta lorategietakoak barne) desagerraraziz edo estaliz. Funtsezkoa da, era berean, norbere burua eltxoetatik babestea (uxagarriak, babesteko arropa eta etxeak eltxoen aurka babestea). Osasuneko profesionalek ere erne egon behar dute, tokiko transmisioak edo inportazioak gertatzen ari diren antzematzeko, eta, hala, birus horien hedapena prebenitzeko.
Europar Batasunak arlo horretako informazioa ematen die herritarrei –eta, bereziki, bidaia batetik itzuli direnei edo bidaia bat antolatzen ari direnei– Gaixotasunak Prebenitzeko eta Kontrolatzeko Europako Zentroaren bidez.
