Europako Batzordeak iragarki berri bat eta etiketa berri bat aurkeztu ditu EB mailan, EBko merkatuan saldutako produktuentzat. Etiketa berriei esker, enpresek kontsumitzaileei beren eskubideei buruzko informazio hobea emanen diete, eta produktuen etiketak uniformeak izanen dira. Kontsumitzaileak jakinaren gainean produktu iraunkorragoak aukeratzeko gaituko dituzte, irtenbide zirkularren eskaria suspertuko dute eta, azken batean, ekonomia zirkularrean aurrera egiten lagunduko dute. Iragarkia eta etiketa kontsumitzaileak trantsizio ekologikorako ahalduntzeari buruzko zuzentaraua aplikatzeko neurriak dira, zeina datorren urtetik aurrera aplikatuko baita.
Nahitaezko jakinarazpenaren helburua da kontsumitzaileen legezko berme-eskubideak azaltzea eta bat ez datozen produktuekin jokatzeko moduari buruz orientabide praktikoak ematea. Argi eta garbi erakutsi behar da EBko txikizkako salmenta-gune guztietan, bai linean, bai lineaz kanpo. Gainera, produktuendako etiketa berri bat sortu da bi urteko aldi estandarretik haragoko iraunkortasun-bermea borondatez eskaintzen duten enpresentzat, produktu guztia kontsumitzailearendako kostu gehigarririk gabe estaliz gero.
Europako kontsumitzaileek produktuek gutxienez bi urteko legezko bermea izateko eskubidea dute, kontsumitzaileak babesteari buruzko EBko legeriarekin bat etorriz. Berme horrek saltzaileei konponketa edo ordezkapen bat doan emateko exijitzen die, adibidez produktu batek espero bezala funtzionatzen ez badu. Egoera jakin batzuetan, kontsumitzaileek prezioa murrizteko edo osorik itzultzeko eskubidea ere izan dezakete.
Estatu kideek zuzentaraua zuzenbide nazionalera ekarri behar dute 2026ko martxoaren 27rako, beranduenez. Zuzentaraua aplikatzen hasten denean, 2026ko irailaren 27tik aurrera, EB osoko kontsumitzaileak iragarkia eta etiketa praktikan ikusten hasiko dira.
