Berrogeita hamar bat enpresa turistikok parte hartu dute aste honetan Turismo Zuzendaritza Nagusiak Iruñean, Lizarran eta Leireko Monasterioan antolatutako prestakuntza-ikastaro batean, Nafarroak behaketa astronomikoan interesa duten pertsonei eskaintzen dien eskaintza turistikoa handitzeko. Ikastaroa Starlight Fundazioak eman du.
Ekimen hori Nafarroako Donejakue Bideek Starlight helmuga turistiko gisa jasotako ziurtagiriaren parte da. Ziurtagiri horrek izarrak behatzeko gaueko zeruen kalitatea aitortzen du.
Ana Rivas Turismoko zuzendari nagusiak monitore astronomikoaren txartela eman die ikastaroan parte hartu duten pertsonei. Ikastaroak 60 orduko prestakuntza teorikoa eta praktikoa konbinatu ditu. Parte-hartzaile gehienak turismo aktiboko eta kulturako enpresetako, ostatuetako, naturaguneen kudeaketako, toki-entitateetako eta Nafarroako turismo-elkarteetako langileak dira.
Gogorarazi behar da, halaber, Turismo Zuzendaritza Nagusia Izarren bidea programa sustatzen ari dela azken hilabete hauetan. Proposamen turistiko berritzaile horrek behaketa astronomikoa eta ibilbide gidatuak, ardo-dastatzeak, dastatze gastronomikoak eta zuzeneko musika konbinatzen ditu, Donejakue Bidearekin lotutako hamar kokagune kultural eta naturaletan. Hurrengo saioak honako hauek izanen dira: Irunberriko arroilan irailaren 27an; Garesen urriaren 4an; Tebasko gazteluan urriaren 25ean; eta Lizarrako Hilobi Santuaren elizan azaroaren 8an.
Jarduketa horiek Europar Batasuneko Next Generation funtsen kargura finantzatzen dira, eta gauzatzeko Espainiako Gobernuaren Suspertze, Eraldatze eta Erresilientzia Planaren onespena dute, zehazki, Xacobeo 2021 Turismo Plan Nazionalarena.
