Europako Batzordeak orientazio-dokumentu bat aurkeztu du sare elektrikoak etorkizunerako prest daudela bermatzeko. Etorkizuneko ikuspegia duten sare elektrikoak garatzeko inbertsio aurreratuei buruzko dokumentua da, eta sare elektrikoetako inbertsioek etorkizuneko beharrak islatzeko baldintza egokiak sortzen laguntzea du helburu, aldi berean bermatuz industriaren lehiakortasuna eta kontsumitzaileek prezio eskuragarriak izatea. Jarraibide berriek hiru arlotan aurkezten dituzte gomendioak: sarearen plangintza, kontrol arautzaileak, eta kostuak eta pizgarriak.
Aurreratutako inbertsioek sare elektrikoaren garapen-behar orokorrei heltzen diete, energia eskuratzeko edo energia sorkuntzako proiektuak sarera konektatzeko dauden eskaera jakinetatik harago joanez. Dokumentuaren arabera, inbertsioak sare elektrikoaren garapen-planetan identifikatutako epe ertaineko eta luzeko beharretan oinarritu behar dira, bai estatuz estatu, bai Europar Batasunaren mailan. Era berean, inbertsioek Europar Batasuneko energia- eta klima-helburuak lortzen lagundu behar dute.
Estimazioa da 2040rako 730.000 milioi euroko inbertsioak egitea banaketaren arloan eta 477.000 milioi eurokoak elektrizitatea garraiatzeko sareen garapenean. Dokumentua Europar Batasuneko herrialdeei, agintaritza arautzaile estatalei, eta elektrizitatea garraiatzeko eta banatzeko sistemen operadoreei zuzenduta dago.
