Energia iturri berriztagarriak Europar Batasuneko elektrizitate kontsumo gordinaren % 45,3 izan ziren 2023an, eta horrek, 2022arekin alderatuta, igoera esanguratsua ekarri zuen: % 4,1ekoa, Europako Batzordeko Europako Estatistika Bulegoaren (Eurostat) datuen arabera. Hori izan da energia berriztagarriak elektrizitatearen kontsumo gordinean duen proportzioan izandako urteko igoerarik handiena, 2004an denbora segida hasi zenetik.
Energia eolikoa (guztizkoaren % 38,5) eta hidroelektrikoa (% 28,2) EBn 2023an iturri berriztagarrietatik sortutako elektrizitate guztiaren bi heren baino gehiago izan ziren. Ondoren eguzki energia nagusitu zen, % 20,5 izan baitzen; eta bioerregai solidoak eta beste iturri berriztagarri batzuk % 6,2 eta % 6,6 izan ziren, hurrenez hurren.
Eurostaten datuek erakusten duten bezala, azken hamarkadan elektrizitate berriztagarriaren hazkundea energia eolikoaren eta eguzki energiaren hedapenari esker lortu da, neurri handi batean. Eguzki energia da hazkunderik handiena izan duen iturria: 2008an 7,4 TWh-ekoa besterik ez zen, eta 2023an, berriz, 252,1 TWh-ekoa.
2004an denbora segida hasi zenetik, elektrizitatearen kontsumo gordinean energia berriztagarriak duen proportzioaren urteko igoerarik handiena 2023an erregistratu zen, % 4,1ekoa izan baitzen. Zehazki, energia berriztagarriaren proportzioa ia hirukoiztu egin zen 2004tik 2023ra bitartean. Gainera, 2022ko (% 3,5) eta 2020ko (% 3,3) urteko igoerak izan ziren urteko igoeren artean bigarren eta hirugarren handienak, hurrenez hurren.
