Europako Batzordeak «Urte anitzeko hurrengo finantza-esparrurako ibilbidea» komunikazioa argitaratu du. Komunikazio horretan, urte anitzeko hurrengo finantza-esparruaren (UAFE) diseinuan eragina izanen duten erronka politiko eta aurrekontu-erronka nagusiak azaltzen dira, eta oinarriak ezartzen dira EBren epe luzerako aurrekontua beharren eta lehentasunen bilakaerara nola egokitu hausnartzeko. Komunikazio horrekin batera, Batzordeak Europako kanpaina bat jarri du abian alderdi interesdun batzuekin, estatu kideetako gobernuak, eskualde-erakundeak eta herritarrak barne.
EBren aurrekontua, EBren lehentasunen erdigunean
Europaren aurrekontuak Europa osoko eta Europaz kanpoko herritarrei, nekazariei, ikertzaileei, enpresei eta eskualdeei laguntzen die. Erakutsi du funtsezkoa dela europarren bizitza hobetzeko. NextGenerationEUrekin batera, krisi pandemiko eta energetiko bat gainditzen lagundu du, konfinamenduetan milioika lanpostu salbatuz eta gure etorkizun garbi eta digitalean inbertituz. EBren aurrekontuak aurrekaririk gabeko babesa eman zien Ukrainari eta Europako segurtasunari Errusiaren eraso-gerraren aurrean.
Epe luzerako hurrengo aurrekontua 2028an hasiko da, eta zirkuluaren koadratura konpondu beharko du: EBk jarduteko espektatiba etengabe handitzen doa. EBren aurrekontua gure anbizioen parera egoteko eta NextGenerationEU maileguen itzulketa bermatzeko, eta, aldi berean, estatu kideen finantza-ekarpen nazionalak egonkor mantentzeko, baliabide propio berriak ezarri behar ditugu. Egungo egoerari eustea ez da aukera bat, erabakiak hartu behar dira. EBk gastatzen duen euro bakoitzaren eragina maximizatu behar du, EBren lehentasunetan eta EBren ekintza ezinbesteko duten helburuetan zentratuz.
Erronka berriak eta EBk jarduteko espektatibak direla eta, berriz aztertu behar dugu EBren aurrekontuak nola funtzionatzen duen, etorkizunera egokitzeko. Europa aske, demokratiko, sendo, seguru, oparo eta lehiakor baten helburuak EBren aurrekontu eraberritua eta indartua eskatzen du, sinpleagoa, malguagoa, espezifikoagoa eta eragin handiagokoa.
EBren aurrekontu moderno baterako ikuspegi berriak herrialde bakoitzerako plan bat barne hartu behar du, funtsezko erreformak eta inbertsioak dituena, nazioko, eskualdeko eta tokiko agintaritzekin batera diseinatuak eta aplikatuak. Lehiakortasunerako Europako Funtsak sektore estrategikoei eta teknologia kritikoei laguntzeko behar adinako inbertsio-ahalmena ezarri behar du. Era berean, kanpo-ekintzaren finantzaketa berrituak eragin sakonagoa izan behar du, espezifikoagoa izan behar du eta interes estrategikoekin bat etorri behar du, kanpo-politika berri bat lortzen laguntzeko. Zuzenbide-estaturako babes gehigarriak ere ezarri behar ditu aurrekontuak. Gainera, EBren aurrekontuak diru-sarrera modernizatuak eduki behar ditu, gure lehentasun komunetarako finantzaketa nahikoa eta iraunkorra bermatzeko.
